অসমৰ ৰাজনৈতিক ৰণক্ষেত্ৰ: এফালে দুৰ্ধৰ্ষ ‘Captainship’, আনফালে অস্তিত্বৰ যুঁজত জৰ্জৰিত বিৰোধী

তিনিচুকীয়া, জয়ন্ত গৌতমঃ অসমৰ ৰাজনৈতিক আকাশত এতিয়া কোনো ধোঁৱা নাই, ছবিখন একেবাৰে ফটফটীয়া। এফালে মুখ্যমন্ত্ৰী ড° হিমন্ত বিশ্ব শৰ্মাৰ নেতৃত্বত এক সুসংগঠিত আৰু আক্ৰমণাত্মক ‘কমাণ্ড ষ্ট্ৰাকচাৰ’, আনফালে খহনীয়া আৰু নেতৃত্বৰ সংকটত দিশহাৰা হৈ পৰা বিৰোধী শিবিৰ। ৰাজ্যৰ শেহতীয়া ৰাজনৈতিক প্ৰেক্ষাপটে স্পষ্ট কৰি দিছে যে এইবাৰৰ যুঁজ কেৱল নিৰ্বাচন জিকাৰ নহয়, ই হ’ল নিজৰ অস্তিত্ব ৰক্ষা কৰাৰ এক চূড়ান্ত পৰীক্ষা।

মুখ্যমন্ত্ৰী হিমন্ত বিশ্ব শৰ্মাই বিজেপিৰ ভিতৰত এক মুখ, এক সুৰ আৰু এক দিশ নিশ্চিত কৰিছে। দলটো এতিয়া কেৱল এটা ৰাজনৈতিক সংগঠন হৈ থকা নাই, ই এক অত্যাধুনিক ‘কেম্পেইন মেচিন’লৈ ৰূপান্তৰিত হৈছে। দলৰ ভিতৰত কোনো বিকল্প কণ্ঠ বা দ্বিধাৰ স্থান নাই। ওপৰৰ পৰা তললৈকে নিৰ্দেশনা একেবাৰে স্পষ্ট আৰু শৃংখলাবদ্ধ।

যিটো সময়ত বিৰোধীয়ে নিজৰ মাজতে আলচ কৰি আছে, সেই সময়ত গেৰুৱা বাহিনীয়ে ইতিমধ্যে যুদ্ধক্ষেত্ৰত নিজৰ স্থিতি সুদৃঢ় কৰি তুলিছে।

আনফালে, কংগ্ৰেছৰ অৱস্থা এতিয়া শীতকালৰ গছৰ দৰে হৈ পৰিছে, যাৰ পাতবোৰ লাহে লাহে সৰি পৰিছে। প্ৰদ্যুৎ বৰদলৈৰ দৰে জ্যেষ্ঠ নেতাৰ বিজেপিলৈ ঢাপলি মেলা কাৰ্যই এটা ডাঙৰ সংকেত দিছে— ৰাজনীতিত এতিয়া আদৰ্শতকৈ ‘চাৰ্ভাইভেল’ বা ৰাজনৈতিক অস্তিত্ব ৰক্ষাহে বেছি গুৰুত্বপূৰ্ণ হৈ পৰিছে। ইয়াৰ অৰ্থ হ’ল, ৰাজনীতিৰ মাটিত এতিয়া আবেগতকৈ শক্তি আৰু নিৰাপদ স্থানৰ প্ৰয়োজনীয়তা বেছি।

কংগ্ৰেছত কোনো ডাঙৰ বিস্ফোৰণ হোৱা নাই যদিও ভিতৰৰ মাটিবোৰ দিনে দিনে সৰি পৰিছে, যাৰ ফলত দলটো ক্ৰমান্বয়ে দুৰ্বল হৈ পৰিছে।

গৌৰৱ গগৈ: কৌশল নে দুৰ্বলতা?
এই হাহাকাৰৰ মাজত এজন ব্যক্তি এতিয়াও ৰৈ আছে— তেওঁ হ’ল গৌৰৱ গগৈ। তেওঁৰ ৰাজনীতি বৰ্তমান নীৰৱ। নাই কোনো প্ৰচণ্ড আক্ৰমণ, নাই কোনো দৌৰা-দৌৰ। বহুতে ইয়াক দুৰ্বলতা বুলি ক’ব খোজে যদিও একাংশৰ মতে ই এক সুদূৰপ্ৰসাৰী কৌশল হ’ব পাৰে। গৌৰৱে হয়তো সঠিক সময়ৰ বাবে অপেক্ষা কৰিছে।

কিন্তু প্ৰশ্ন হয়— এই অপেক্ষা কিমান দীঘলীয়া হ’ব? ৰাজনৈতিক সুযোগ হেৰুওৱাৰ পিছত কৰা অপেক্ষাই শেষত কোনো ফল নিদিবও পাৰে।

অসমৰ ৰাজনীতি এতিয়া এক বিচিত্ৰ যুদ্ধক্ষেত্ৰ। এফালে এজন নিশ্চিত ‘সেনাপতি’য়ে জয়ৰ লক্ষ্যৰে আগবাঢ়িছে, আনফালে এমুঠিমান ‘অপেক্ষাৰত সৈনিক’ যিয়ে এতিয়াও নিজৰ লক্ষ্য স্থিৰ কৰিব পৰা নাই। জয় কাৰ হ’ব, সেয়া কেৱল শক্তিৰে নহয়— সময় আৰু সঠিক মূহূৰ্তত লোৱা সঠিক সিদ্ধান্তইহে স্থিৰ কৰিব।