আমেৰিকাৰ ‘নাকৰ’ ওপৰত বহি চোৰাংচোৱাগিৰি চীনৰ!

China is spying on America’s ‘tip of the nose’!

আন্তৰ্জাতিক সেৱা, ১২ জুনঃ শেহতীয়াকৈ ৱাল ষ্ট্ৰীট জাৰ্নেলে এক প্ৰতিবেদন প্ৰকাশ কৰিছে। ইয়াত কোৱা হৈছে যে কিউবাৰ পৰা চীনৰ নতুন চোৰাংচোৱাগিৰিৰ প্ৰচেষ্টা চলি আছে। কিন্তু আমেৰিকাৰ ফ্ল’ৰিডাৰ পৰা এই দ্বীপটো মাত্ৰ ১৬০ কিলোমিটাৰ দূৰত।

আমেৰিকাৰ প্ৰভাৱশালী সংবাদ মাধ্যমৰ এনে প্ৰতিবেদনৰ প্ৰতি লক্ষ্য ৰাখি বৰ্তমানৰ আমেৰিকাৰ ৰাষ্ট্ৰপতি জো বাইডেনৰ প্ৰশাসনৰ এজন বিষয়াই কয় যে চীনে কেইবাদিনো কিউবাত চোৰাংচোৱাগিৰি কৰি আহিছে। তেওঁ লগতে কয় যে তেওঁলোকৰ তথ্য সংগ্ৰহৰ সুবিধা তাত অধিক অত্যাধুনিক কৰি তোলা হৈছে।

যোৱা বৃহস্পতিবাৰৰ প্ৰতিবেদন অনুসৰি দুয়োখন দেশে দ্বীপ দেশ কিউবাত ইলেক্ট্ৰনিক ফিংগাৰপ্ৰিণ্টিং কেন্দ্ৰ স্থাপনৰ বাবে গোপন চুক্তিত উপনীত হৈছে। কিন্তু ব্ৰিটিছ সংবাদ সংস্থাটোৱে এক প্ৰতিবেদনত কয় যে আমেৰিকা আৰু কিউবা দুয়োখন চৰকাৰে এই প্ৰতিবেদনক লৈ গুৰুতৰ সন্দেহ প্ৰকাশ কৰিছে।

বাইডেন প্ৰশাসনৰ বিষয়াগৰাকীয়ে নাম প্ৰকাশ নকৰাৰ চৰ্তত কয় যে সংবাদ মাধ্যমে যি কৈছে সেয়া আমাৰ বুজাবুজিৰ সৈতে সামঞ্জস্যপূৰ্ণ নহয়। কিন্তু প্ৰতিবেদনত ক’ত ভুল বা দুৰ্বলতা আছে, বা চীনে সঁচাকৈয়ে কিউবাত কেন্দ্ৰ স্থাপনৰ চেষ্টা কৰিছে নে নাই সেই সম্পৰ্কে বিতংভাৱে একো ক’বলৈ সন্মত হোৱা নাছিল।

অৱশ্যে আমেৰিকাৰ বিষয়াগৰাকীয়ে কয় যে কিউবাৰ পৰা চীনৰ চোৰাংচোৱাগিৰিৰ বিষয়টো জো বাইডেনৰ ৰাষ্ট্ৰপতিত্বৰ পূৰ্বৰ। সেই সময়ত বেইজিঙে সমগ্ৰ বিশ্বতে চোৰাংচোৱা তথ্য সংগ্ৰহৰ আন্তঃগাঁথনি শক্তিশালী কৰি আছিল। তেওঁ কয়, ই এটা চলি থকা বিষয়, নতুন একো নহয়। চীনৰ গণৰাজ্যই ২০১৯ চনত কিউবাত নিজৰ তথ্য সংগ্ৰহ কেন্দ্ৰসমূহ আধুনিকীকৰণ কৰে। আমাৰ চোৰাংচোৱাৰ ৰেকৰ্ডত ই ভালদৰে সোমাই আছে। ৱাশ্বিংটনত থকা চীনৰ দূতাবাসৰ এজন বিষয়াক এই সন্দৰ্ভত মন্তব্য দিবলৈ কয় ৰয়টাৰে। কিন্তু কোনো মন্তব্য নকৰাকৈ বৈদেশিক পৰিক্ৰমা মন্ত্ৰালয়ৰ মুখপাত্ৰই দিয়া বক্তব্য চাবলৈ অনুৰোধ জনায়। চীনৰ বৈদেশিক মন্ত্ৰালয়ৰ মুখপাত্ৰই তেওঁৰ মন্তব্যত আমেৰিকাক “সৰ্বাধিক শক্তিশালী হেকাৰ সাম্ৰাজ্য” বুলি অভিহিত কৰে। তেওঁ কিউবাৰ চোৰাংচোৱা কেন্দ্ৰৰ বিষয়ে আলোচনা কৰি ৱাশ্বিংটনে “উৰাবাতৰি আৰু নিন্দা বিয়পাইছে” বুলিও অভিযোগ কৰে।

ইফালে, বাইডেন প্ৰশাসনৰ বিষয়াগৰাকীৰ মন্তব্যৰ প্ৰতি তৎক্ষণাত কোনো সঁহাৰি নিদিলে কিউবা চৰকাৰে। অৱশ্যে দেশখনৰ সহকাৰী বৈদেশিক মন্ত্ৰী কাৰ্লোছ ফাৰ্নাণ্ডেজ ডি কোচিঅ’ই ৱাল ষ্ট্ৰীট জাৰ্নেলৰ প্ৰতিবেদনক একেবাৰে মিছা বুলি অভিহিত কৰিছে। ইয়াৰ বিপৰীতে তেওঁ দাবী কৰে যে ৱাশ্বিংটনে এই ভুৱা বক্তব্যসমূহ আমেৰিকাই কিউবাৰ ওপৰত দশক দশক ধৰি জাপি দিয়া নিষেধাজ্ঞাক ন্যায্যতা প্ৰদান কৰিবলৈ দিছে।