ফলাফলৰ পাঁচ দিনৰ পাছতো তিনি ৰাজ্যৰ মুখ্যমন্ত্ৰীৰ নাম ঘোষণাত বিবুদ্ধিত বিজেপি
নেশ্যনেল ডেস্ক, ৮ ডিচেম্বৰঃ বিজেপিয়ে তেওঁলোকৰ নিজ নিজ নেতা নিৰ্বাচনৰ বাবে মধ্য প্ৰদেশ, ছত্তীশগড় আৰু ৰাজস্থানত ইয়াৰ বিধায়িনী দলসমূহৰ বৈঠক তদাৰক কৰিবলৈ কেন্দ্ৰীয় পৰ্যবেক্ষক নিযুক্তি দিছে। ৰাজস্থান, মধ্য প্ৰদেশ আৰু ছত্তীশগড়ৰ পৰৱৰ্তী মুখ্যমন্ত্ৰীৰ পদৰ বাবে ভাৰতীয় জনতা পাৰ্টীয়ে নেতা বাছনি কৰাক লৈ অনিশ্চয়তা অব্যাহত আছে।
বিধায়িনী দলৰ নেতা নিৰ্বাচিত হোৱাৰ পিছতে তিনিখন ৰাজ্যৰ মুখ্যমন্ত্ৰীসকলে শপত গ্ৰহণ কৰিব। শেহতীয়া নিৰ্বাচনত বিজেপিয়ে মধ্যপ্ৰদেশত ক্ষমতা বজাই ৰাখি কংগ্ৰেছৰ পৰা ৰাজস্থান আৰু ছত্তীশগড় আঁজুৰি আনিছিল ।
তিনিখন হিন্দী বলয়ৰ ৰাজ্যত মুখ্যমন্ত্ৰী প্ৰাৰ্থী বাছনি কৰাৰ বাবে দলৰ শীৰ্ষ নেতাসকলৰ মাজত ব্যস্ত আলোচনা অব্যাহত আছে। গেৰুৱা দলটোৱে অহা বছৰ লোকসভা নিৰ্বাচনত নতুন মুখ্যমন্ত্ৰীসকলে কি গুৰুত্বপূৰ্ণ ভূমিকা পালন কৰিব লাগিব তাক বিবেচনা কৰি নামবোৰ চূড়ান্ত কৰিবলৈ সময় লৈছে।
আনহাতে, কংগ্ৰেছে প্ৰশ্ন উত্থাপন কৰিছে যে বিজেপিয়ে তিনিখন ৰাজ্যৰ বাবে মুখ্যমন্ত্ৰী ঘোষণাত আৰু কিমান সময় পলম কৰিব?
ইয়াৰ মাজতে ৰাজস্থানৰ প্ৰাক্তন মুখ্যমন্ত্ৰী বসুন্ধৰা ৰাজে আজি ৰাষ্ট্ৰীয় ৰাজধানীত বিজেপিৰ ৰাষ্ট্ৰীয় সভাপতি জে পি নাড্ডাক সাক্ষাৎ কৰে। সূত্ৰসমূহে কয় যে ৰাজস্থানৰ মুখ্যমন্ত্ৰী পদৰ আন প্ৰতিদ্বন্দীসকল হৈছে মহত বালাক নাথ, দিয়া কুমাৰী আৰু ৰাজ্যভাৰদন সিং ৰাঠৌৰ।
শেহতীয়া বিধানসভা নিৰ্বাচনত, বিজেপিয়ে ২৫ নৱেম্বৰৰ একক পৰ্যায়ৰ নিৰ্বাচনত ১৯৯ খন আসনৰ ভিতৰত ১১৫ খন আসন লাভ কৰিছিল।
বৃহস্পতিবাৰে বিজেপিৰ ৰাষ্ট্ৰীয় সভাপতি নাড্ডাই কেন্দ্ৰীয় গৃহমন্ত্ৰী অমিত শ্বাহক দিল্লীৰ বাসগৃহত সাক্ষাৎ কৰে। দুয়োজন নেতাৰ মাজত কি আলোচনা হ’ল সেয়া জানিব পৰা হোৱা নাই।
অৱশ্যে, বিজেপিৰ কিছু নেতাই কয় যে চলিত সংসদ অধিৱেশনৰ প্ৰতি লক্ষ্য ৰাখি মুখ্যমন্ত্ৰী বাছনি কৰিবলৈ আৰু কিছু সময় লাগিব। দুইৰ পৰা তিনি দিনৰ ভিতৰত, হিন্দী হলয়ৰ ৰাজ্যসমূহত বিজেপিৰ মুখ্যমন্ত্ৰীসকলৰ বিষয়ে স্পষ্টতা উদ্ভৱ হ’ব, সূত্ৰটোৱে কয়।